Tukuna he tāpaetanga

Overview

Tirohanga whānui

I whakatūria te Tira Ārai Urutā i te Tīhema 2022.

I tū te wāhanga tuatahi o Te Uiui KOWHEORI-19 atu ki te 28 o Nōema 2024, me tētahi wāhanga mō ngā tāpaetanga tūmatanui i te pane o te 2024. Kua tīmata te Wāhanga Tuarua o te Uiui ināianei. E titiro ana te Wāhanga Tuarua ki ētahi kaupapa anō kāore i tirohia i te Wāhanga Tuatahi, me te āta tirotiro i ētahi o ngā kaupapa o te Wāhanga Tuatahi, pērā i ngā whakaturetanga me te noho rāhui.

Ko te aronga matua o te Wāhanga Tuarua ko te arotake i ngā whakatau matua a te Kāwanatanga o Aotearoa hei urupare ki te KOWHEORI-19 i te 2021 me te 2022. Arā, kei te āta titiro ki ngā whakatau matua a te Kāwanatanga e pā ana ki:

• Ngā kano ārai mate, tae atu ki ngā whakaturetanga, ngā whakaaetanga, me te haumaru
• Te noho rāhui, inarā ko ngā rāhuitanga o te hiku o te 2021 me te rāhuitanga i whakaroatia i Tāmaki Makaurau/Te Taitokerau.
• Ngā hangarau whakamātautau me te whaiwhai, pērā i te RAT me te taupānga COVID-19 Tracer, me ngā rauemi hauora tūmatanui, pērā i ngā maruhā.

Ka whakamahi mātou i tā mātou arotake o ēnei whakatau matua ki te tohutohu i te Kāwanatanga me pēhea a Aotearoa e whakarite me te urupare ki ngā mate urutā ā muri ake. I te Wāhanga Tuarua ka tuku tūtohu noa ki te Kāwanatanga e pā ana ki ngā kaupapa i runga nei.

Me pēhea e whai wāhi atu

E hiahia ana mātou ki te rongo kōrero i a koe mō te pānga o ngā whakatau matua e rārangihia ana i runga (pērā i te noho rāhui roa ake, ngā whakamātautau RAT koreutu rānei) ki tō oranga, ki te oranga o tō whānau, ō hoa rānei.  

Tukuna mai he kōrero mō te pānga o ēnei whakatau a te Kāwanatanga ki tō mahi, tō pakihi rānei, ō hononga, ngā āhuatanga nui o tō ao, tō hauora, tō mātauranga rānei, te aha atu.

Ka taea tēnei mā te whakakī i te puka tāpaetanga tuihono, ka kitea mā te pāwhiri i te hononga 'Tukuna he tāpaetanga' kei te mutunga o tēnei whārangi.

I te puka, kei a koe te tikanga ki te tuhi i tō tāpaetanga ki te pouaka tuhi i whakaritea, ki te tāpiri rānei i tētahi tuhinga Word, tētahi PDF rānei o tō tāpaetanga. Ka taea te tukuatu i te tuhinga kotahi anake.

Mutu ana te tuku i tō tāpaetanga, ka tukuna ētahi pātai mōu. Kei a koe te tikanga ki te tuku i ēnei kōrero, engari e whakahau ana mātou kia whakakī koe i tēnei. Mā ēnei mōhiohio e āwhina i tā mātou Uiui kia mārama ake mātou ki ō ake whakaaro me te whakarite kia rongo i ngā whakaaro o ngā tāngata rerekē. Ka taea hoki te whakapā atu ki a koe mō tō tāpaetanga mēnā ka hiahia.

Mēnā e raru ana tō whakamahi i te puka tuihono, me īmēra ki te Uiui ki InquiryintoCOVID-19lessons@dia.govt.nz waea rānei ki 0800 500 306. Kia mōhio kāore pea i te wātea he tangata kōrero i tētahi reo atu i te reo Pākehā.

He mōhiohio anō

Ki te hiahia mōhiohio anō mō te Uiui, mō te tuku tāpaetanga rānei, me pānui pea i te whakarāpopototanga o ā mātou tūtohu mahi, pātai auau rānei.

Kia mōhio, e wātea ana ēnei mōhiohio i tētahi tuhinga reo Pākehā.

Ka ahatia ō mōhiohio

Ka noho tapu ngā mōhiohio whaiaro ka tukuna ki te Uiui, pērā i tō ingoa me ō taipitopito whakapā.

Ka noho tapu hoki tō tāpaetanga mō te roanga o te Uiui. Ko te tikanga o tēnei, ka taea e Te Tira Ārai Urutā anahe (tae atu ki ngā rōpū kua whakaritea kia mahi tahi ki a mātou) te pānui i tō tāpaetanga kia oti rā anō te pūrongo Uiui. Hei tāpiri ki tō ingoa me ō mōhiohio, ka taea hoki te tono kia tūturu te noho tapu o te toenga o tō tāpaetanga mā te tohu i te pouaka ki tēnei uiui.

Ko te tikanga o te nohotapu tūturu, kāore e taea e tētahi atu te pānui i tō tāpaetanga, hāunga koutou ko Te Tira Ārai Urutā. Ka hiahia pea koe ki te tono kia tūturu te noho tapu o tō tāpaetanga mēnā he mōhiohio kei roto me kaua tētahi atu e mōhio, pērā i ngā mōhiohio hauora, ngā taipitopito arumoni e pā ana ki tō pakihi rānei. Ko te tikanga o te noho tapu tūturu, kāore e taea e tētahi atu, e koe hoki, te whakapuaki i tō tāpaetanga ki te iwi.

Ka whakamahi pea te Uiui i ngā mōhiohio, ngā kī horipū rānei o tō tāpaetanga ki tā mātou pūrongo whakamutunga, ki ētahi atu whakawhitiwhiti kōrero, hua hoki ka whakaputaina e mātou. Ka tangohia e mātou ngā kōrero tautohu, pērā i te ingoa, ngā taipitopito whāiti rānei, i mua i te whakamahi i tētahi wāhanga o tō tāpaetanga.

Mutu ana te Uiui, ka tukuna ngā tāpaetanga katoa ki Te Rua Mahara o Te Kāwanatanga. E kore e wātea ki te hunga tūamatanui ngā tāpaetanga i whakaaetia kia tūturu te noho tapu. Engari, ka noho wātea ngā tāpaetanga kāore i tonoa kia tūturu te noho tapu mēnā ka tonoa, hei tauira, e tētahi kairangahau, e tētahi atu rānei e aro ana ki ngā mahi a te Uiui.

Kia ora

E mōhio ana ngā Kaikōmihana he pānga nui tō te mate urutā ki ngā tāngata katoa o Aotearoa, ā, ka noho mātāmua tonu taua whakaaro ki te hinengaro i te Uiui e ahu whakamua ana. Ngā mihi mōu i whai wā ki te tuku kōrero mai ki Te Tira Ārai Urutā mō ō wheako. He mea waiwai ki a mātou mahi te rongo kōrero mai i a koe.

Ka kati ngā tāpaetanga i te Rātapu te 27 o Āperira 2025 i te weherua pō.